以下的兩篇文章, 皆出自火燎森的朋友colin, 火燎森有幾多料子, 以及誠信如何, 大家有目共睹.
http://colintsui.com/2009/07/03/277/%e5%b0%8d%e7%81%ab%e7%87%8e%e6%a3%ae%e5%ae%8c%e5%85%a8%e5%a4%b1%e6%9c%9b
對火燎森完全失望
作為曾經係火燎森朋友，我對佢所講、所做都不問究竟而照單全收，但眼見佢既表現，對外所講既野，連我做朋友都開始懷疑，當中有幾多成真…
我開始反複去諗返佢所講所做，越係覺得奇怪，一方面，佢既故事，佢既經歷，有睇過既人都會覺得係傳奇，但當我睇到佢係TVB新聞透視《再見股神》【Youtube版 見4分30秒】，將《卡內基與櫻桃》既古仔當自己經歷用，我真係無野好講，之後問過佢，佢無正面答我…我第一次聽，打從心底裡敬佩你，你仲同我講，個TVB編輯哥哥好欣賞呢個故事，仲不停同佢既下屬分享，佢好想你係鏡頭前講一次…你咁樣欺騙同佢做訪問既個位編輯哥哥，欺騙大眾，將人地既信任，拿來作為自己出名既賭注，會唔會賭得大左D？
你成日被人鬧你宣揚借錢炒股，我會幫你去進一步解釋，但點解總是容不下對呢個方法有懷疑既聲音？【看此】點解你個blog既留言總係無批評既留言？睇你blog既朋友，都係鐘意你既勵志古仔，覺得你係心胸廣闊、永不放棄，努力向自己目標發憤既有為青年，但每逢遇到有反對、質疑聲音，就Delete個留言，難道，這就是心胸廣闊？未曾寫過骷髏會任何一篇(包括個股、經濟、知識、分享…etc)分析文章，難道，這就是努力向目標發憤？
我當日應骷髏會之邀寫blog，係真心認同骷髏會既大好理念，商台希望開拓全新平台，吸納唔同聲音，等大家係從中認識咩係正確投資態度同知識，我係想提高大家係財經方面既交流。甚至，係想睇下火燎森既真正實力。
但事與願違，隨住時間過，火燎森依舊唔多講股、又唔多講市，節目入面既經濟分析，都係來自本地兩大財經報紙，論點未免空洞貧乏，相信有聽佢節目既朋友都略有同感。甚至，有朋友不禁問我：「究竟佢有幾認識股市？有幾認識經濟？」
作為聽眾，我有同佢講過個節目，引用左我一位做專題報道既記者朋友既意見，例如，多d一手資料，多d有深度分析，個節目追聽性會高d，但聽到佢教人搵工，我忍唔住笑左出黎，因為我同佢係大學同學，佢畢業見過幾份工可以用一隻手可以數得哂，但佢竟然開咪教大家搵工？！之前已經教大家分別真假人民幣(內容都係黎自各大報紙)，點解唔花多d心機做好個內容呀！？
節目入面有環節叫《骷髏會論戰室》，據我知，佢從未參與過骷髏會既內容，(其實有，唯一一篇，詳情請見附文)。但就拿當中內容作己用，最重要係，希望「火燎森＝骷髏會」既感覺能得而延續，最少，知道骷髏會存在既人都會咁諗。將骷髏會內容、名氣同自己捆綁一齊，令人覺得自己係有識之士，咁樣同將骷髏會呢個平台變做自己Fans Club無分別，骷髏會又何以做出成績？你又如何面對骷髏會幕後努力既朋友？
各位，係時候清醒。
片刻失去所有信任既感覺的確難受，我作為曾經係佢既朋友，感受更深，我翻覆諗過，最後決定平心靜氣，寫左呢篇blog，希望認識佢既朋友，明白我既信息。
林肯總統曾經講過："You can fool some of the people all of the time, and all the people some of the time, but you can not fool all of the people all of the time." 可惜，火燎森未聽過。
附文：
火燎森唯一一篇幫骷髏會寫文，就係分析匯豐供股好唔好【http://www.881903.com/page/zh-tw/snb_report.aspx?ItemId=101533】，但文一出，就俾人話抄文【http://mrmarketofhk.blogspot.com/2009/03/blog-post.html】，我骷髏會既朋友因為呢篇，俾佢激到喊左出黎，佢地一班人，成擔心機準備骷髏會內容，就俾佢一粒老鼠屎搞壞一窩粥…唉！
http://colintsui.com/2009/06/05/158/%e7%9f%a5%e8%ad%98%e7%94%a2%e6%ac%8a%ef%bc%8c%e4%b8%8d%e5%8f%af%e7%9b%9c%e7%ab%8a%ef%bc%81
知識產權，不可盜竊！
回應傻羊兄的問題，願來很多人都以為骷髏會是火燎森的One Man Band，以為所有分析文章都出自他的手筆（佢有咁叻咩？）。
其實非也。據Colin所知，火燎森對骷髏會的貢獻幾乎是零，甚至可以講係負面影響。真正為骷髏會出力的是另有一班人。而Colin則認識其中幾位。
以火燎森的一貫做法，把別人的努力當為自己的功績，這並不出為奇，佢亦不是第一次咁做。抄襲卡內基與櫻桃事件便可見一斑。
骷髏會所出的分析文章，雖未至於一流質素，但絕對不會抄襲。當Colin知道有其中一篇關於匯豐的文章，有抄襲市場先生的嫌疑時，隨即致電給我的朋友，問過究竟。得到的答案是「這是唯一一篇，火燎森為骷髏會所寫的文章。」
當時Colin感到非常憤怒，為何唯一一篇文都要抄？用心寫篇文真的咁難嗎？為何連抄都唔肯下點功夫？自己衰就好啦，點解要攪埋骷髏會？
火燎森的一篇文章令到骷髏會背上抄襲之名，而且火燎森更不知悔改，死口否認。這是Colin跟火燎森劃清界線的原因之一。
由此可見，火燎森與骷髏會的關系，並不是什麼主席或會長之類的東西。其實是老鼠屎與一煲湯。
把別人的努力當作自己的功績，這是火燎森最拿手的把戲。
跟畢菲特買股票如是，抄襲卡內基與櫻桃如是，強搶骷髏會功勞亦如是。真的想問問火燎森，知道什麼叫知識產權嗎？
